வாருங்கள் சொந்தங்களே வணக்கம்,
நாட்டால்,இனத்தால்,மதத்தால்,சாதியால் பிளவு பட்டு நிற்கும் மனிதர்களை ஒன்றிணைக்கும் சக்தி மனிதத்திற்கு மட்டுமே உண்டு. மனிதத்தால் மட்டுமே மனிதர்களை ஒன்றிணைக்க வேண்டும். அதுவே உலக அமைதிக்கும்,மகிழ்ச்சிக்கும் வித்திடும். முடிந்தவரை நாம் மனிதத்தை விதைப்போம், வளர்ப்போம். உலகம் அமைதி பெற வழி செய்வோம்.
என்றும் மனிதமுடன்
புரட்சி
(இராச.புரட்சிமணி )

Saturday, November 12, 2016

மோடி செய்தது சாதனையா? மோசடியா?


மோடி கருப்புப்  பணத்தை ஒழித்தார் என்று நினைக்கிறீர்களா? அவர் கருப்புப்  பணத்தை வைத்திருந்தவர்களை தப்பிக்க வைத்திருக்கிறார் என்பதே  மாபெரும் உண்மை.  அதைவிட ஒரு மாபெரும் உண்மை கீழே.

கருப்பு பணம் வைத்திருந்தவர்கள் உழைத்து சம்பாதிக்கவில்லை. ஊழல் செய்து, லஞ்சம் வாங்கி சம்பாதித்தனர். அரசாங்கத்தை ஏமாற்றி பதுக்கினர்.அவர்கள் பணத்தை பணமாக மட்டும் வைத்திருக்கவில்லை நகை, வீடு, நிலம் என மாற்றி விட்டனர். சிலப்பலர் வெளி நாட்டிற்கும் கொண்டு சேர்த்துவிட்டனர். இப்பொழுது பணத்தை செல்லாததாக மாற்றியதால் அவர்களுக்கு குறைந்த அளவே பாதிப்பு ஏற்படும். அரசியல்வாதிகளும் பெரு வியாபாரிகளும் தான் கருப்பு பணத்தை வைத்துள்ளனர்.

ஒருவன் தவறு செய்தால் என்ன செய்யவேண்டும்? தண்டனை தர வேண்டும் (திருந்தவாவது). இங்கே இவர்களுக்கு தண்டனை தரப்பட்டதா என்றால் இல்லை.

 பதுக்கிய பணம் செல்லாததாக மாறியதே அவர்களுக்கு தண்டனை என்று நினைக்காதீர்கள்.பதுக்கிய கருப்பு பணத்தையும் சிலபலர் வெள்ளையாக மாற்றிவிடுவர். வெள்ளையாக  மாற்றாதவர்களுக்கு நட்டம் மட்டுமே.  இந்த நட்டத்தை அவர்கள் விரைவில் இலாபமாக மாற்றிவிடுவர்.

இப்பொழுது சொல்லுங்கள் மோடி என்ன செய்துள்ளார். தவறு செய்தவர்களுக்கு தண்டனை தராமல் தப்பிக்க வைத்துவிட்டார். இப்படி தவறு செய்தவர்கள் குறைந்த பட்சம் 2% முதல் மிக மிக அதிக பட்சமாக 20%. இவர்கள் அனைவரையும் தப்பிக்க வைத்ததோடு குறைந்தபட்சம் 80% முதல் 98% மக்களுக்கு தண்டனை அளித்து விட்டார்.  (உண்மையில் தண்டிக்கப்படவேண்டியவர்கள் அந்த2% முதல்  20% தான்)

இன்று சாப்பாட்டிற்கு வழியில்லாமல், செலவுக்கு காசில்லாமல், மருத்துவமனையில் வைத்தியம் பார்க்க முடியாமல்,  கல்யாணம் பண்ண முடியாமல் எத்தனை பேர் படாத பாடு படுகிறார்கள் என்று உங்களுக்கே தெரியும்.

ஆனால் இந்த தண்டனை அளிக்கப்பட மக்களில் சிலர் என்ன நினைக்கிறார்கள் என்றால்  கருப்பு பணம் ஒழிந்தது. கருப்பு பணம் வைத்திருந்தவர்கள் ஒழிந்துவிட்டார்கள் என்று. அது உண்மையல்ல என்பது உங்களுக்கு புரியும் என நினைக்கின்றேன்.இவர்களை பாராட்ட வேண்டும். கருப்பு பணம் ஒழிந்தால் நாடு முன்னேறிவிடும் என்று நம்பிக்கையில் இவர்கள் படும் சிரமத்தை பெரிதாக எடுத்து கொள்ளவில்லை.


கருப்பு பணம் வைத்துள்ளவர்கள் இத்துடன் திருந்துவார்களா என்றால் இல்லை. இருக்கும் கருப்பு பணத்தை வெள்ளையாக மாற்றுவர். எதிர்காலத்திலும் இதே போலவே தொடருவர். ஏன் எனில் கருப்பு பணத்தால் அவர்கள் இழந்ததை விட அடைந்ததே அதிகம்.


 மோடி மக்களை நன்றாக  முட்டாளாக்கி விட்டார். தவறு செய்தவர்களை தப்பவிட்டுவிட்டு தவறு செய்யாதவர்களை தண்டித்ததோடு மட்டுமல்லாமல் இருவர் மனதிலும் நல்ல பெயரை வாங்கி விட்டார். தப்பித்தவனுக்குத்தான் தெரியும் அப்பாடா மோடி நம்மள விட்டுட்டாரு என்று. பொதுமக்கள் அப்பாடா கருப்பு பணத்தை மோடி ஒழித்துவிட்டார் என்று தூக்கி வைத்து கொண்டாடுகிறார்கள் ஏமாளியாக.

இப்பொழுது இருவர் ஓட்டுமே மோடிக்குத்தான்.  அதுமட்டுமல்லாமல் பல கோடி ரூபாய் பாஜகவிற்கு நன்கொடையாக போக வாய்ப்பிருக்கிறது.

உண்மையில் இந்த நடவடிக்கையின் மூலம் மோடி ஒழித்தது கருப்பு பணத்தை என்பதை விட கள்ள நோட்டுக்களை என்பதே சரி. இது அவர்களுக்கும் தெரியும் இந்த நடவடிக்கையால் முற்றிலும் ஒழிய போவது  கள்ள நோட்டுக்கள் என்பது  (அதுவும் சிலபல மாதங்களுக்கு)

கள்ள நோட்டுக்களை ஒழித்தோம் என்று கூறுவதை விட கருப்பு பணத்தை ஒழித்தோம் என்று கூறினால் தான் மக்களின் நன்மதிப்பை பெறமுடியும் என்பதால் தான் கருப்பு பணம் ஒழிக்கப்பட்டது என்று அவர்கள் விளம்பரப்படுத்தி கொள்கிறார்கள்.

 உண்மையை உரக்க கூறாமல் பொய்யுரைப்பது சரியா? அதோடு நிற்காமல் இவர்கள் நேர்மையோடு இல்லாமல் மக்கள் நேர்மையாக இருக்க வேண்டும் என்று கூறுவது ஏற்ப்புடையதா?

கருப்பு பணம் வைத்திருந்தவர்களை தப்ப வைத்ததும், கள்ளநோட்டுக்களை ஒழித்ததை விளம்பரப்படுத்தாமல் கருப்பு பணத்தை ஒழித்தோம், கருப்பு பணம் வைத்திருந்தவர்களை தண்டித்து விட்டோம் என்பதும் மோசடியா இல்லையா?


உங்களில் சிலர் இது கொஞ்சம் காலத்துக்குத்தான் அப்புறம் மக்களுக்கும் நாட்டிற்கும் நன்மை என்று நினைப்பீர்கள். அப்படி இருந்தால் இதை எழுத வேண்டிய அவசியமே எனக்கு இல்லை. நாட்டின் நலனிற்காக மக்களின் நலனிற்காக இந்த சிரமங்களை அனைவரும் பொறுத்துக்கொள்வோம் எனலாம். இவ்வளவு சிரமங்களுக்குப்பிறகும் பழைய குருடி கதவை திறடி என்பதை போல கள்ள நோட்டும் வரும், கருப்பு பணமும் பெருகும்,மக்களும் பாதிக்கப்படுவார்கள்  என்று தெரிந்தும் மோடி அரசு தன்னுடைய சுய நலத்திற்காக,ஓட்டுக்காக இவ்வாறு செய்து மக்களை முட்டாளாக்குவது சாதனையா  அல்லது   மோசடியா?

 உங்கள் கருத்துக்கள் வரவேற்க்கப்படுகின்றன.

(சிலபல கருத்துக்களை நீளம் கருதி இப்பதிவில் தவிர்த்துள்ளேன்.)

மக்களுக்கு இது  நன்மையளிக்கும் செயல் என்பது ஒரு மாயை.உண்மையில் மக்களுக்கு பாதிப்பே. அடுத்த பதிவில் உங்கள் மாயை விலகும்....நீங்கள் விரும்பினால். இந்த நடவடிக்கையால் என்ன நன்மைகள் கிடைக்க உள்ளன என்று நீங்கள் கூறினால் கலந்துரையாட வாய்ப்பாக அமையும். 

குறை கூறுவது எளிது இதற்க்கு என்ன மாற்று உங்களிடம் உள்ளது என்று கேட்டால் மடை திறந்த வெள்ளம் போல் மாற்று வழியும் அதற்க்கு அடுத்த பதிவில் வரும்...நீங்கள் விரும்பினால் மட்டும். உங்களிடம் மாற்று வழி இருந்தாலும் தெரியப்படுத்துங்கள்.


என்றும் மனிதமுடன் 
இராச.புரட்சிமணி 

Wednesday, May 18, 2016

திமுகவிற்கு சாதகமாக 2016 தேர்தல் அமையுமானால் என்ன காரணம்?

அதிமுகவின் மீது பெரிய அதிருப்தி  இல்லையென்றாலும் நடந்து முடிந்த 2016 தேர்தலில்  பெரும்பாலான கருத்து கணிப்புகள்  திமுகவிற்கு முன்னிலை கிடைக்கும் என்றே கூறுகின்றன. ஒருவேளை திமுக முன்னிலை பெற்றால் அல்லது  ஒரளவு அதிக சீட்டுக்கள் பெற்றால் அதற்க்கான காரணங்கள் என்னவாக இருக்கும்?

திமுக எதிர்ப்பு ஓட்டுக்கள் பிரிவது:
என்னுடைய கணிப்பில் ஆளும் கட்சிக்கு இருப்பதை விட திமுகவிற்கே அதிக எதிர்ப்புகள் உள்ளன.
ஈழத்தமிழர் படுகொலை, 2G ஊழல்  இந்த இரண்டையும் இன்னும்  மக்கள் மறக்கவே இல்லை.இந்த திமுக எதிர்ப்பு ஓட்டுக்கள் அதிமுகவிற்கு சென்றிருந்தால் அதிமுகவிற்கே முன்னிலை கிடைக்கவேண்டும்.
ஆனால் இந்த எதிர்ப்பு ஓட்டுக்களை சீமான், மக்கள் நல கூட்டணி,பாமக, பாஜக  போன்றோரும் கைப்பற்றுவதாகே தெரிகிறது,

அதிமுக ஓட்டுக்களை இழப்பது:
 மாற்றத்தை முன்னிறுத்தும் கட்சிகள் அதிமுகவிற்கு கிடைக்கவேண்டிய ஓட்டுக்களை சேர்த்தே பிரிக்கின்றனர். திமுக அதிமுக இருமுனை போட்டியாக இருப்பின் இவர்கள் அதிமுகவிற்கே வாக்களித்திருப்பார்கள்.

-அன்புமணியால் வன்னியர் ஓட்டுக்கள் பிரிகின்றன.
-விஜயகாந்த்-திருமாவளவன் கூட்டணி கவர்ச்சி மற்றும்  தாழ்த்தப்பட்டவர்களின் ஓட்டுக்களை பிரிக்கின்றது.
- சென்னையில் மற்றும் பிற பகுதிகளில்  பாஜக, மற்றும் மக்கள் நல கூட்டணிக்கு ஓட்டுக்கள் பிரிகின்றது
இது அதிமுகவிற்கு பாதகமாகவும், திமுகவிற்கு சாதகமாகவும் அமைகிறது

இனவாத மதவாத ஓட்டுக்கள்:
-திமுகவின் பலமான திராவிட இனவாத அரசியல் தெலுங்கு மக்களின் பெரும்பாலான ஓட்டுக்களை பெறுகிறது.அதிமுக அரசின் தெலுங்கு வழி கல்வி நிறுத்தமும் தெலுங்கு ஓட்டுக்களை திமுக பெற வழிவகுக்கிறது.நாம் தமிழரின் தமிழ் இனவாதமும் சில தெலுங்கர்களை  திமுக பக்கம் நகர்த்தி இருக்க வாய்ப்புண்டு.

-தன்னுடைய  இசுலாமிய கிருத்துவ மதவாதம் மூலம் அந்த மக்களில் பெரும்பாலானவர்களின் ஓட்டுக்களை பெறுகிறது.

அதிமுக எதிர்ப்பு ஓட்டுக்கள்:
பிற கட்சியினரும் இந்த ஓட்டுக்களை பெற்றாலும் திமுகவிற்கும் இது செல்கிறது. குறிப்பாக வெள்ளம் பாதித்த பகுதிகளில்,சென்னையில், பொதுவாக பெரும்பாலனா அரசாங்க ஊழியர்களின் ஓட்டுக்கள் திமுகவிற்கு செல்லவே வாய்ப்பு இருப்பதாக தெரிகிறது

 நான் சென்ற பதிவில் கூறியது போல அதிமுக தவிர பிற கட்சிகளுக்கு போடும் ஒவ்வொரு ஓட்டும் திமுகவிற்கு  சாதமாகத்தான் போகின்றது.

இவ்வாறாக ஓட்டுக்கள் பிரிந்தும்  அதிமுக ஆட்சியை தக்க வைக்குமானால் அல்லது அதிக இடங்களை கைப்பற்றுமானால் அது அதிமுகவின் நல்லாட்சிக்கு  கிடைத்த வெற்றியே.

Friday, May 13, 2016

இவர்களுக்கா ஓட்டு போட போறீங்க? சிந்திப்பீர்களா?

நீங்கள் யாருக்கு ஒட்டு போட போகிறீர்கள் என்பதில் தான் தமிழ் நாட்டின் தலையெழுத்து உள்ளது. 

நாம் தமிழர்:
புதிய கட்சி. ஆனால் அதே பழைய பிரித்தாளும் எண்ணம். வாய்ப்பு கொடுக்க எண்ணினால் கடலூரில் மட்டும் நாம் தமிழருக்கு ஓட்டளிக்கலாம். 

பாஜக:

வாஜ்பாய் பாஜக வேறு மோடி பாஜக வேறு. பிரித்தாளும் எண்ணம் கொண்ட இந்த கட்சி வளர கூடாது. 

பாமக:
இருக்கின்ற கட்சிகளிலே வளர்ச்சியை பற்றி அதிகம் பேசும் கட்சி. தாழ்த்தப்பட்டவர்களுக்கு அதீத அங்கீகாரம் கொடுத்த கட்சி. சாதிமுலாம் பூசப்பட்ட கட்சி.   கட்சியில் மாற்றம் ஏற்ப்பட்டுள்ளது. இது நிரந்தர மாற்றமாக இருப்பின் அடுத்த தேர்தலில் வாய்ப்பளிக்கப்பட வேண்டிய கட்சி. இப்பொழுது பென்னாகரத்தில் அன்புமணிக்கு  வாக்களிக்கலாம்.

தேமுதிக-மக்கள் நல கூட்டணி- தமாகா :

கூட்டணி அமையாததால் இவர்களாகவே அமைத்துக்கொண்ட கூட்டணி. 
கூட்டணியின்  நடசத்திர வேட்பாளர்களுக்கு வாக்களிக்கலாம்.

திமுக-காங் :

இது ஒரு கொலைகார கொள்ளைக்கார கூட்டணி. இதற்க்கு தயவு செய்து வாக்களிக்காதீர்கள். தந்தைக்கும் தனயனுக்கும் மட்டும் வேண்டும் என்றால் ஓட்டு போடுங்கள். 

நல்ல வேட்பாளர்கள்:
எல்லா கட்சியிலும் நல்லவர்கள் சிலர் இருப்பார்கள். சுயேட்சையாக கூட சிலர் இருப்பார்கள். இவர்களுக்கு வாக்களிக்க தவறவே கூடாது. இவர்களே நாளைய நல்லரசியலை முன்னெடுப்பார்கள்.

நோட்டா: 
தயவு செய்து இதற்க்கு உங்கள் ஓட்டை வீணாக்காதீர்கள்.

அதிமுக:

ஊழல் குற்றச்சாட்டு உள்ள கட்சி என்றாலும் திமுக அளவிற்கு இல்லை. எதிர்பாராத வெள்ளத்தின் போது செயல்பாடு விமர்சனத்திற்குள்ளானாலும் மீட்டெடுப்பதில் சிறப்பாக செயல்பட்டது.
திமுக கொண்டுவந்த மின்வெட்டை அறவே நீக்கியது அதிமுக. இது ஒன்றுக்கே அதிமுகவிற்கு வாக்களிக்கலாம். அதிமுக மீது குறைகள் இல்லாமல் இல்லை. இருப்பினும் திமுகவை விட பரவாயில்லை என்பதே என் கருத்து.

அதிமுக, திமுக வேண்டாம் மாற்றம் வேண்டும் என்று நீங்கள் பிறருக்கு வாக்களித்தால் அது திமுகவிற்கே சாதகமாக அமையும். மற்றவர்களுக்கு போடும் ஒவ்வொரு ஓட்டும் திமுகவிற்கு போடுவதற்கு சமமாகும்.

மாற்றம் நிச்சயம் வேண்டும் ஆனால் இத்தேர்தல் அதற்க்கான தருணம் அல்ல. அதிமுகவிற்கு வாக்களித்து திமுகவிற்கு மூடு விழா நடத்துவோம். சிந்தித்து வாக்களியுங்கள். மாற்றுக்கருத்து இருப்பின் தெரிவியுங்கள்.

Monday, April 4, 2016

மதவாதம் மற்றும் தேசியவாதம் என்னய்யா நடக்குது நாட்டுல?

உலகில், நாட்டில் நடப்பவை அச்சத்தையும் வருத்தத்தையும் தருகின்றது. ஒருபுறம் உலகெங்கும் இசுலாமின் பெயரால்  குண்டு வெடிப்புகள், போர்கள். மறுபுறம் இந்தியாவில் இந்துமதத்தின், நாட்டுப்பற்றின்  பெயரால் வெறுப்புகளை வன்முறைகளை தூண்டும்படியான பேச்சுகள், செயல்பாடுகள்.

மதாவதம் தவறு என்று இங்கே பலர் உணர்ந்துள்ளனர். அதேபோல தேசியவாதம் என்பதும் தவறு என்பதே என்னுடைய கருத்து. மதம் மற்றும் தேசியத்தின் உண்மையான நோக்கம் ஒற்றுமையாக வாழ்வதுதான். இவைகளால் ஒற்றுமைக்கு கேடு வரும்பொழுது ஒன்று அவற்றை சீர்திருத்த வேண்டும் அல்லது தூக்கி எறியவேண்டும்.


கழுத்தில் கத்தி வைத்தாலும் பாரத் மாதா கி ஜே சொல்லமாட்டேன் என்பதும், சட்டம் இல்லையென்றால் பாரத் மாதா கி ஜே சொல்லாதவர்களின் தலையை வெட்டுவேன் என்பதும், பாரத் மாதா கி ஜே சொல்லாதவர்களுக்கு இந்தியாவில் இடமில்லை என்பதும்  வெறுப்பையும், ஒற்றுமையின்மையையும் உருவாக்கும் பேச்சுக்களே. இவர்கள் உணர்ச்சிவசப்பட்டு பேசியிருந்தால் அதற்காக வருந்தி மன்னிப்புக் கோரி இருக்கலாம். அவ்வாறு செய்யாத பட்சத்தில் இவர்கள்  தண்டண்டைக்குரியவர்களே.

தானாகவே வீடியோ தயாரித்து தேசத்திற்கு எதிராக, காஷ்மீர் பிரிவினைக்கு ஆதரவாக  குரல் எழுப்பியதாக குற்றம் சாட்டி தேச துரோக சட்டத்தில் கைது செய்வதும் காலம் காலமாக இந்தியாவிடமிருந்து காஷ்மீரை பிரிக்க என்னும் சக்திகளோடு கூட்டணி அமைத்து ஆட்சி அமைப்பதும்  அருவருக்கத்தக்க  தேசியவாதம்  அல்லாமல் வேறு என்ன?

ஒவ்வொரு தனிமனிதனுக்குள்ளும் மனிதம்  இருக்கவேண்டும், ஒவ்வொரு தலைவனுக்குள்ளும் மனிதம் இருக்கவேண்டும், ஒவ்வொரு அரசாங்கமும் மனிதமோடு இருக்க வேண்டும். மனிதம் இல்லையென்றால் அங்கே அழிவுதான் இருக்கும்.

மனிதத்தை கட்டி காப்பது நம் ஒவ்வொருவரின் கடமை. இதை நாம் செய்யாவிடில் நாளைய தலைமுறையின் எதிர்காலம் கேள்விக்குறியே. மதவாதத்திற்கும்,தேசியவாதத்திற்கும் மற்றும் எந்த ஒரு பிரிவினை வாதத்திற்கும் உங்கள் நெஞ்சில் இடம் தராதீர்கள். இவற்றிற்கு எதிராக குரல் எழுப்புங்கள். சிந்தித்து செயல்படுங்கள்.

என்றும் மனிதமுடன்
இராச.புரட்சிமணி 

Saturday, August 8, 2015

சமணம் என்பது ஏன் ஜைன மதம் அல்ல?

தமிழகத்தில் பலர்  சமணம் என்பது ஜைன (Jainism) மதத்தை குறிப்பதாகவே எழுதி வந்திருக்கின்றனர்..வருகின்றனர். ஆனால் இது ஒரு மாபெரும் வரலாற்றுப்பிழை. இந்தப்பிழையை சமணமும் தமிழும் என்ற நூல் எழுதிய  மயிலை.சீனி. வேங்கடசாமி அவர்களும் செய்கிறார். அதற்கு அவர் கூறும் காரணம் 

//இந் நூலில் ஜைனர் என்னும் சொல்லுக்குப் பதிலாகச் சமணர் என்னும் சொல் வழங்கப்பட்டுள்ளது. இதன் காரணம் இவ் வச்சகத்தில் வடமொழி அச்செழுத்துக்கள் அதிகம் இல்லாமையேயாம். ஜைன நண்பர்கள் இதனைப் பொருட்படுத்த மாட்டார்கள் என்று நம்புகிறேன்.//

தன்னுடைய பௌத்தமும் தமிழும் என்ற நூலில் 

//வடநாட்டிலிருந்து தென்னாட்டில் வந்த மதங்களைப் பண்டைப் பெரியோர் இரண்டு வகையாகப் பிரித்திருக்கின்றனர். அவை பிராமண மதம், சிரமண மதம் என்பன. பிராமணமதம் என்பது வைதீக மதம். சிரமண மதம் என்பது பௌத்த ஜைன மதங்களாகும். சிரமணம் என்னும் சொல் தமிழில் சமணம் என வழங்கும். சமணமதம் என்றால், ஜைனமதத்துக்குமட்டும் பெயராக இக்காலத்தில் பெரும்பான்மையோரால் கருதப்படுகிறது. ஆனால், சமணம் என்னும் சொல், வைதீக மதத்தவரல்லாத பௌத்தர் ஜைனர் மதங்களுக்குப் பொதுப் பெயராகப் பண்டைக் காலத்தில் வழங்கிவந்தது.// என்று கூறுகிறார்.

இவர் கூறியதிலிருந்து இங்கே நாம்  நாம் புரிந்து கொள்ள வேண்டியது என்னவெனில் பௌத்த,ஜைன மதத்தை குறிக்க பயன்படுத்தப்பட்ட பொது சொல்தான் சமணம் எனபது. சமணம் எனபது தனி ஒரு மதம் அல்ல. அவர் சமணம் என்ற சொல்லை  "ஜை"  எனும்  வட மொழி அச்செழுத்துக்கள் இல்லாததால் தான் பயன்படுத்தியுள்ளார்.

மயிலை, சீனி. வேங்கடசாமி ஐயா செய்த தவறு என்னவெனில் 
முதல் தவறு : சமணம் எனபது பௌத்த ஜைன மதங்களை குறிக்க பயன்படும் பொது சொல் என்றுணர்ந்தும் ஜைன மதத்திற்கு சமணம் என்ற சொல்லை பயன்படுத்தியது.

இரண்டாம் தவறு: சமணம் என்ற சொல் ஆசீவக மதத்தையும் உள்ளடக்கியது என்பதை அறியாதது. ஆம் உண்மையில் சமணம் என்ற சொல் ஆசீவக மதத்தையும் குறிக்க பயன்படுத்தப்படும் ஒரு சொல்.

 ' சாவகர் அருகர் சமணர் ஆகும் ;
           ஆசீ வகரும் அத்தவத் தோரே ' -  என்று சேந்தன் திவாகரம் கூறுகிறது. 

 இந்த இடத்தில்  அவர் சமணம் என்பதற்கு ஜைனம் என்று பொருள் கொண்டு  ஆசீவக மதம் ஜைன மதத்தின் ஒரு பகுதியாக கொள்ளப்படுகிறது இது தவறு என்கிறார். 


ஆனால் சேந்தன் திவாகரம்  ஜைன மதம் என்றோ ஜைன மதத்தை குறிக்கும் ஆருகத மதம் என்றோ குறிப்பிடவில்லை. அது தெளிவாக சமணர் என்று குறிப்பிடுகிறது.  இந்த இடத்தில் நாம் எவ்வாறு பொருள் கொள்ளவேண்டும் எனில் ஆசீவக மதமும் சமண மதம் என்று புரிந்து கொள்ளவேண்டும். 
ஐயா அவர்கள் ஆசீவக மதமும் ஜைன மதம் என்று கூறியுள்ளதாக புரிந்து கொண்டார் இதுதான் அவர்  செய்யும் இரண்டாம் தவறு.


--------------------------------------------------------------------------------------------------
சமணம் என்ற சொல் ஜைனம், ஆசீவகம், பௌத்தம் என்ற மதங்களை குறிக்கும் என்றாலும் பெரும்பாலும்  சமணம் என்ற சொல்லை ஜைனம் அல்லது ஆசீவக மதத்தை  அல்லது இரண்டையும் குறிக்கவே பயன்படுத்தியுள்ளதாக தெரிகிறது.

பௌத்தத்தை சமணம் என்று அதிகமாக அழைக்கவில்லை.


"உறி பிடித்து ஊத்தைவாய்ச் சமணொடு சாக்கியர்"
         "கைத வச்சமண் சாக்கியர் கட்டுரைக் கின்றதே"
        "குண்டர் தம்மொடு சாக்கியர் சமணருங்"
        "சிந்தை திருகல் சமணர், தேரர், தவம் என்னும்" 
        "மண்டை கொண்டுழல் தேரர் 
         மாசுடை மேனிவன் சமணர் "

என்ற தேவார திருப்பதிகங்களில்  பௌத்த மதம் தனியாக சொல்லப்படுவதை காணலாம்.. 

இங்கே சமணம் எனபது உண்மையில் ஜைனர்களை குறிக்கின்றதா அல்லது ஆசீவகர்களை குறிக்கின்றதா அல்லது இருவரையும் குறிக்கின்றதா எனபது உண்மையில் இதை பாடியவருக்கு மட்டுமே தெரியும்.இருவரையும் குறிக்க பயன்படுத்தப்பட்டுள்ளது என்றே நான் நினைக்கின்றேன். ( "கைத வச்சமண் சாக்கியர் கட்டுரைக் கின்றதே" என்ற இடத்தில் பௌத்தத்தை மட்டும் குறிக்கின்றதா என்பதிலும் எனக்கு சிறு குழப்பம் உண்டு.ஏன் எனில் பௌத்தமும் ஒரு சமண மதம்தானே?)


பௌத்த மதத்தை சமணம் என்று சொல்லியதுண்டா என்றால் பெரும்பாலான இடங்களில் சொல்லவில்லை என்றே சொல்ல வேண்டும். ஆனால் 

"துவருறு விரிதுகி லுடையரு மமணரும்" என்ற தேவார திருப்பதிக பாடல் இங்கு சமணர் என்று கூறி பௌத்தர்களை கூறுகிறது.
இதற்கு உரை எழுதியவர்கள்
  //துவர் ஏற்றிய விரிந்த ஆடையினை உடுத்தும் போர்த்தும் திரியும் புத்தரும் சமணரும்// என்று கூறுகிறார்கள்.


இப்பதிவின் மூலம் நான் சொல்ல நினைத்தது என்னவெனில் 

1.சமணம்  என்ற சொல் வட இந்தியாவை பொறுத்தவரை வைதீக (பார்ப்பன) மதம் அல்லாத பிற மதங்களை குறிக்க பயன்படுத்திய சொல் என்று அறிஞர்கள் கூறுகிறார்கள்.இதற்க்கு இரண்டு காரணங்கள் சொல்லப்படுகிறது.  ஒன்று சமண என்பதற்கு தேடுபவர் என்ற பொருள் பாளி மொழியில் உள்ளதாகவும். இவர்கள் யாவரும் தவம் மூலம் உண்மையை கண்டறிய முயல்வதால் இவர்களை குறிக்க  சமண என்ற சொல் பயன்படுத்தப்பட்டது என்றும்  இவர்கள் கடுமையான நடைமுறைகளை மேற்க்கொள்வதால் இவர்களை சிராவண-சிராமண  என்ற சொல்லால் குறித்தனர் என்றும் சொல்லப்படுகிறது. ஜைன, ஆசீவக, பௌத்த மற்றும் வேறு சில மதங்களை சிராமண மதங்கள் என்று அழைத்துள்ளனர். 


2. தமிழகத்தை பொருத்தவரை சமணம் என்ற சொல் ஜைன மற்றும் ஆசீவகமதத்தை  குறிக்கவே பெரும்பாலும் பயன்படுத்தப்பட்டுள்ளது. சில இடங்களில் பௌத்தத்தையும் குறிக்க பயன்படுத்தப்பட்டுள்ளது.

3. சமணம் என்ற சொல்லை ஜைனத்துக்கு  மட்டுமே எடுத்துகொண்டு பல ஆய்வு முடிவுகள் வெளியிடப்பட்டுள்ளன. உண்மையில் அந்த இடத்தில் சமணம் என்ற சொல் ஜைன, ஆசீவக, பௌத்த மதங்களில் எதை குறிக்கின்றது என்று  தமிழ் அறிஞர்கள் மறு ஆய்வு செய்ய வேண்டும்.

4. ஜைன (சைன )மதத்தையோ அல்லது ஆசீவக மதத்தையோ தனியாக  குறிக்க சமணம் என்ற சொல்லை தவிர்க்க வேண்டும் 

Tuesday, August 4, 2015

இவர்கள் ஏன் போலி மது ஒழிப்பு போராளிகள்?

எந்த அரசியல் கட்சி தலைவராவது  தன்னுடைய தொண்டர்களை பார்த்து மது அருந்தாதீர்கள் என்று கூறியது உண்டா? மது அருந்துவதின் பாதகங்களை எடுத்துரைத்தது உண்டா? மதுவிற்கு அடிமையாக உள்ளவர்களை எப்படி மீட்பது என்று சிந்தித்து சொன்னதுண்டா?  இதை எதையும் செய்யாமல் போராட்டம் நடத்துபவரை போலி மது ஒழிப்பு போராளிகள் என்றுதானே சொல்லவேண்டும்?

எனக்கு தெரிந்து ஒரு சில அரசியல் தலைவர்கள் உண்மையாகவே மது ஒழிப்பிற்காக குரல் கொடுத்து வருகின்றனர். அதில் முக்கியாமானவர் மருத்துவர் ஐயா அவர்கள். இவர் அவப்பொழுது  போராட்டங்களும் அறிக்கைகளும் விட்டு வருகின்றார். அடுத்ததாக வைகோ அவர்களை சொல்லலாம். இவர் மது விலக்கை வலியுறுத்தி நடைபயணம் செய்துள்ளார்.  நடை பயணத்திற்கு பிறகு இவர் இதில் எந்த அளவு அக்கறை காட்டினர் என்பது தெரியவில்லை.(இப்பொழுது நடத்தும் போராட்டங்கள் தவிர்த்து). 

மது விலக்கு வேண்டிய இந்த தலைவர்கள் தங்கள் தொண்டர்களுக்கு தன்னுடைய கருத்தை எடுத்து கூறி இருக்கின்றனரா? குடிக்கின்ற எத்தனை பேரை இவர்கள் திருத்தியுள்ளனர்? முதலில் ஒருவன் ஏன் குடிக்கின்றான் என்ற உளவியல் காரணம் இவர்களுக்கு தெரியுமா? மது கிடைக்காவிட்டால் ஒருவனின் மனநிலை என்னவாகும் என்று இவர்களுக்கு தெரியுமா?மதுவால் அடிமை பட்டுள்ளவர்களுக்கு மறுவாழ்வு அளிப்பது எப்படி என்ற திட்டத்தை முன் வைத்துள்ளனரா?

எனக்கு தெரிந்து இவ்வாறான செயல்களில் இவர்கள் ஈடுபடவில்லை என்றே நினைக்கின்றேன். இவர்களிடம் இதற்கான திட்டங்கள் இருக்கலாம். ஆனால் அது இன்னும் பொதுவெளிக்கு வரவில்லை. இதுவரை திட்டங்கள் இல்லை எனில் இனி சிந்தித்து திட்டங்களை வகுக்க வேண்டும்.செயல்படுத்த வேண்டும். இவர்களை தவிர்த்து இன்று தமிழகத்தில் நடக்கும் மது ஒழிப்பு போராட்டங்களில் பல போலியானது. பலர் இதை அரசியலாக்கவே முற்படுகின்றனர்.

மதுவிலக்கு பற்றி பேச திமுகவிற்கு எந்த அருகதையும் கிடையாது. அம்மாவின் ஆட்சியில் குறை சொல்ல ஏதுமில்லை என்பதால் மது விலக்கு என்று நாடகம் ஆடுகின்றனர். இதர உதிரி கட்சிகளும் அரசியல் லாபத்திற்காகவே  போராட்டத்தில் ஈடுபடுகின்றன.

ஐயா சசி பெருமாள் அவர்களின்  மரணம் வேதனையானது. அவர் கோபுரத்தில் ஏறி இருக்க கூடாது. அவரை தூண்டிவிட்டவர்கள்  மீது ஏன் எந்த வழக்கும் போடவில்லை?

மது விலக்கு போராட்டம் என்று வன்முறையில் இறங்காமல் அமைதியான முறையில் போராடவேண்டும். இவ்விடயத்தில் போராட்டத்தை விட விழிப்புணர்வே அவசியம். கட்சிக்காரகர்களுக்கும் பொது மக்களுக்கும் விழிப்புணர்வு ஏற்ப்படுத்த வேண்டும்.

திரைப்படங்களில் வரும் மது, புகைபிடிக்கும் காட்சிகளுக்கு தடை விதிக்க வேண்டும். 

படிப்படியாகத்தான் மது விலக்கை அமுல் படுத்த வேண்டும். நிச்சயம் மதுவிலக்கு சாத்தியம். எப்படி என்பதை மற்றும் ஒரு பதிவில் பார்க்கலாம். 

Saturday, August 1, 2015

யாக்குப் உண்மையில் கைதா? சரணா? நீதி செத்ததா?

யாக்குப் உண்மையில் சரணடையும் இல்லை அவர் சி.பி.ஐயால் தில்லியில் கைது  செய்யப்படவும் இல்லை. நீதியும் சாகவில்லை. எப்படி?

 என்னுடைய முந்தைய கட்டுரையில் யாக்குப் சரணடைந்தார் என்று எழுதியிருந்தேன். அது என்னுடைய பிழையா அல்லது நான் படித்த கட்டுரைகளின் பிழையா என தெரியவில்லை. இருப்பினும் அதை என்னுடைய பிழையாகவே கருதி என்னுடைய முந்தைய பதிவை நீக்கிவிட்டேன். உங்களுக்கு தவறான தகவல் தந்தமைக்கு மன்னிக்கவும். ராமனின் கட்டுரையை  படிக்கும்பொழுதுதான் எனக்கு உண்மை தெரிந்தது.

பல அரசியல் தலைவர்களும் பத்திரிக்கைகளும் யாக்குப் சரணடைந்ததாகவே கூறுகின்றனர். அது தவறான  செய்தி.

உண்மையில் என்ன நடந்தது என்றால்.....

யாக்குப் சரணடையலாமா வேண்டாமா என்று ஆலோசிப்பதற்காக நேபாளத்தில் தன்னுடைய வழக்கறிஞரை சந்திக்க வந்துள்ளார். அவருடைய வழக்கறிஞர் சரணடைய வேண்டாம் என்று அறிவுறுத்தியதால் அவர் மீண்டும் கராச்சி  செல்ல முயல்கிறார்.  காத்மாண்டு விமானநிலையத்தில்  சந்தேகத்தின் பேரில் காவலர்கள் இவரை பிடித்து  விசாரித்து இவரை கண்டறிந்து  இந்தியாவிற்கு அனுப்புகின்றனர். நேபாள  காவலர்களின் உதவியால் தான் அவர் தில்லிக்கு கொண்டுவரப்பட்டார் என்பதை மறைத்து தாங்கள் தான் தில்லியில் யாக்குபை கைது செய்தோம் என்று சி.பி.ஐ கூறிவிட்டது. நேபாள கதையை மறைத்தது  சி.பி.ஐ செய்த குற்றம்.

யாக்குப் தன்னுடைய  குடும்ப உறுப்பினர்களை சரணடைய வைத்துள்ளார். மேலும் விசாரணையில் பல தகவல்களை தந்து உதவியுள்ளார். இதன் அடிப்படையில் தான் ராமன் இவருக்கு தூக்கு தண்டனை  வழங்குவது சரியா என்ற கேள்வி எழுகிறது  என்று கடிதம் எழுதி அதில் பிரசுரிக்க வேண்டாம் என்று எழுதி அனுப்பிவிட்டு பிறகு தொலைபேசியில் தொடர்பு கொண்டு என்னுடைய கடிதத்தில் இருக்கும் செய்திகளை நீங்கள் உங்கள் கட்டுரைகளில் பயன்படுத்திக் கொள்ளலாம் என்கிறார். 

ராமனின் மடலை வைத்து கொண்டு ரெடிப் இணையதளத்தில் சீலா பட் எழுதிய கட்டுரைகள் பல செய்திகளை தந்தாலும் குழப்பத்தையும் தருகிறது. இவரின் கட்டுரையும் யாக்குப் சரணடைந்தார் என்றும்...கைது செய்யப்பட்டார் என்றும் குழப்புகிறது.

இந்த இடத்தில்  விசாரணையில் நேரடியாக தொடர்பில் இருந்த ராமனின் மடலை மட்டுமே நாம் ஆதராமாக கொள்வது சரியாக இருக்கும்.

ராமன் அவர்கள் எழுதிய கடிதத்தில் யாக்குப் சரணடைந்ததாக எங்கும் குறிப்பிடவில்லை. யாக்குபை  நேபாளத்திலிருந்து இந்தியா கொண்டு வரும் பணியை இவர்தான் ஒருங்கிணைத்துள்ளார். நான் மேலே அடர்த்தியான எழுத்துக்களில் எழுதியது ராமனின் மடலில் இருந்து எடுத்தவைதான்.

சரி இந்த வழக்கில் நீதி செத்ததா?

1. சி.பி.ஐ யாக்குபை தில்லியில் கைது செய்ததாக கூறியது உண்மைதான். ஆனால் நேபாள காவலர்கள் உதவியதை கூற மறுத்தது தவறுதான். யாக்குப் தான் நேபாளத்தில் கைது செய்யப்பட்டதாக கூறுவதும் உண்மைதான். ஆனால் அவர் அதிகாரப்பூர்வமாக நேபாள காவல்துறையால் கைது செய்யப்படவில்லை.(யாக்குப் தானாக சரணடைய வில்லை என்பது இங்கே தெளிவாகிறது.)

நேபாளத்தில் அவரை கைது செய்தால் அவரை நேபாள நீதிமன்றத்தில் ஒப்படைக்கவேண்டும். அங்கே அவரை ஒப்படைத்தால் தாவூத்தால் அவர் விடுவிக்கப்படலாம் அதனால் அவர் தப்பிவிடுவார் என்பதால் இந்திய நேபாள காவல்துறையினர் இவ்வாறு நடந்துகொண்டனர் என்று ஒரு கருத்து நிலவுகிறது.

3. யாக்குப் தன்னுடைய குடும்ப உறுப்பினர்கள் சரணடைய உதவி புரிந்துள்ளார். மேலும் தாவூத், டைகர் மேமன் (யாக்குபின் சகோதரர்...இவர்கள் முக்கிய குற்றவாளிகள் ) இவர்களை பற்றிய சில தகவல்களையும் தந்துள்ளார். ஆனால் நீதிமன்றத்தில் இவர் குடும்பத்தை சரணடைய வைத்த உண்மையை யாக்குபும் சரி, அவரது வழக்கறிஞரும் சரி சொல்லவில்லை. இதை நீதிமன்றத்தில் கூறி இருந்தால் அவருக்கு தூக்கு தண்டனையிலிருந்து விலக்கு அளிக்கப்பட்டிருக்கலாம் என்று ராமன் கருதினார். ஆக இந்த இடத்தில் யாக்குபும் அவரது வழக்கறிஞரும் தவறு செய்துள்ளது தெரியவருகிறது.

4.அதிமுக்கியமாக குண்டுவெடிப்பில் யாக்குப் மிகப்பெரும் பங்கு வகித்ததாக நீதிமன்றம் கருதுகிறது. டைகர் மேமன் கொடுக்கும் உத்தரவுகள் இவர் மூலமாகவே சில நேரங்களில் குண்டு வைத்தவர்களுக்கு சென்றுள்ளது.இவர்   இல்லை  என்றால் இந்த தாக்குதல்  நடந்திருக்க வாய்ப்பே இல்லை என்று நீதிமன்றம் கருதுகிறது. இவர் குண்டுவெடிப்புக்கு பல உதவிகள் புரிந்துள்ளார்.   இதனால் தான் இவருக்கு தூக்கு தண்டனை தரப்படவேண்டும் என்று நீதிமன்றம் கூறியது. மேலும் இவர் செய்த குற்றத்திற்கு வருந்தவும் இல்லை தன்னுடைய குற்றத்தை ஒப்புக்கொள்ளவும் இல்லை.

5. யாக்குப் தான் குற்றம் செய்யவில்லை என்று கடைசி வரை கூறுகிறார். ஆனால் நீதிமன்றம் இவர் குற்றம் செய்ததற்கான பல ஆதாரங்களை  தருகிறது. அவர் குற்றமவர் என்று கூறும்படி அவரும் அவரது வழக்கறிஞரும் ஒரு ஆதாரத்தை கூட வைக்கவில்லை. ராமனும் இவர் நிரபராதி என்று கூறவில்லை.

ராமனின் மடல் மற்றும் உச்ச நீத்மன்றத்தின் தீர்ப்பு நகலையும் வைத்து பார்க்கும்பொழுது யாக்குப் சரணடையவில்லை என்பதும் அவர் குற்றம் புரிந்துள்ளார் என்பதும் தெரியவருகிறது. ஆதலால் நீதியும் செத்ததாக கூற இயலாது. 257 பேரை கொல்ல 700 பேர் காயமுற காரணகர்த்தாவாக இருந்தவருக்கு மரண தண்டனை விதித்தது சரியா தவறா என்பதை அவரவர் மனசாட்சிக்கே விட்டுவிடுகின்றேன்.

உச்சநீதிமன்ற தீர்ப்பை படித்து பார்த்தால் அவர்கள் எடுத்த முடிவு சரி என்றே எனக்கும் படுகிறது.

நீதி நிச்சயம் சாகவில்லை. இதே வழக்கில் பலருக்கு தூக்கு தண்டனையை ரத்து செய்துள்ளார்கள். யாக்குப் செய்த குற்றத்தின் அளவை பொறுத்தே அரிதினும் அரிதான தூக்கு தண்டனை அவருக்கு அளிக்கப்பட்டுள்ளது.

உங்கள் பார்வைக்கு  ராமனின் கடிதத்தையும் (இங்கே) உச்ச நீதிமன்ற  தீர்ப்பு நகலையும் (இங்கே) தந்துள்ளேன்.


இசுலாமிய தலீத் மக்களை உசுப்பிவிடும்படி பலர் பேசுவதும் எழுதுவதுமாக உள்ளனர். அவர்களும் என்னைப்போலவே உண்மை தெரியாமல் இருந்திருக்கலாம். இதை வாசித்த பிறகாவது தங்கள் எண்ணங்களை மாற்றிக்கொள்ளும்படி கேட்டுக்கொள்கின்றேன்.

மாற்றுக்கருத்துக்கள் வரவேற்கப்படுகின்றன.

என்றும் உண்மையுடன் 
இராச.புரட்சிமணி 

Thursday, July 30, 2015

கலாம் மற்றும் யாக்குபின் வாழ்க்கை நமக்கு சொல்வது என்ன?

இருவருமே பிறப்பால் இசுலாமியர்....
இருவருமே நன்கு கல்வி கற்றவர் ...
இருவருமே குரானை படித்தவர்கள் தான்....
கலாம் அனைத்து மக்களையும் நேசித்தார்....
யாக்குப் மக்களை கொன்றான் ...
கலாம் மதத்ததை கடந்தவர்...யாக்குப் மதத்தால் மரணித்தவன்
மதத்தை கடந்தால் மகானாகலாம் என்று கலாம் வாழ்க்கை சொல்கிறது
மதவெறி பழிவாங்கும் வெறி கொண்டு மக்களை கொன்றால் கொல்லப்படலாம் என்று யாக்குப் வாழ்க்கை சொல்கிறது

கலாமின் வாழ்க்கையும் யாக்குபின் வாழ்க்கையும் நிச்சயம் படிப்பினைதான்...இதை சரியாக புரிந்து கொண்டால் நீங்களும் மகானாகலாம் தவறாக புரிந்து தவறாக நடந்தால் கொல்லப்படலாம்.

கலாமின் மரணம் எனக்கு வருத்தத்தை தரவில்லை .....
அவர் கடைசி மூச்சு உள்ளவரை மக்களுக்காக உழைத்து கொண்டிருந்தார் என்பதை எண்ணி பெருமிதம் கொள்கிறேன்.வருத்தமும் கொஞ்சம் உண்டு...இன்னும் கொஞ்சம் ஆண்டுகள் உயிரோடு இருந்திருக்கலாமே என்று.

யாக்குபின் மரணம் எனக்கு சற்று வருத்தத்தை தந்தது இந்தியா நீதி தவறி விட்டதோ என்று...
--------------------------------------------------

கலாம் பற்றிய சில எதிர்மறை விமர்சனங்களை  படிக்க நேரிட்டது...அவை அர்த்தமற்றவை....அவர்களில் ஒரு சிலர் அடுத்த யாகூபாக கூட மாறலாம் எனபது எனக்கு மிகுந்த வருத்தத்தை அளிக்கிறது.
அவர்களுக்கு அவர்கள் வழியிலேயே எனக்கு பதில் சொல்ல தெரியும். என்னுடைய கருத்துக்கள் பிற நல்ல இசுலாமியர்கள் மனதையும் புண்படுத்தும் என்பதால் என்னுடைய  எதிர்வாதத்தை இங்கு தவிர்க்கிறேன்.

 கலாம் கூடங்குளம் குழுவினரை சந்தித்து தன்னுடைய கருத்தை பகிர்ந்து கொண்டிருக்கலாம். மற்றபடி அவர் கூடங்குளம்  விடயத்தில் தவறு செய்தார் என்பதற்கில்லை.

யாக்குப் பற்றி சில நேர்மறை விமர்சனங்களை படிக்க நேர்ந்தது...அவற்றில் பாதி அர்த்தமற்றவை....பாதி அர்த்தம் உள்ளவை.
யக்குப் நிரபராதி அல்ல ...அவர் விசாரணைக்கு ஒத்துழைத்தும் மரணதண்டனை அளித்தது என்பது நிச்சயம் ஏற்றுக்கொள்ளும்படியாக இல்லை.

இனி ஒரு யாக்குப்  இந்த மண்ணில் பிறக்க கூடாது...யாரும் யாக்குபாக மாறக்கூடாது
இனி பல கலாம்கள் பிறக்க வேண்டும்...பலரும் கலாம்களாக மாற வேண்டும்
அதற்க்கு எல்லாம் வல்ல இறைவன்,கடவுள், இயற்கை துணை நிற்கட்டும்.

என்றும் மனிதத்துடன்
இராச.புரட்சிமணி 

Friday, July 17, 2015

பாகுபலி படம் மெய்யாலுமே நல்லா இருக்கா?

எல்லோரும் ஆகா ஓகோ என்றதால் இப்படத்திற்கு நேற்று சென்றேன். இல்லாவிட்டாலும் சென்று இருப்பேன் சில நாட்கள் கழித்து. படம் எப்படி இருக்கு என்றால் முதல் பாதியில் பாதி செம மொக்கை என்பேன்.  அதற்க்கு பிறகு கொஞ்சம் பரவாயில்லை. இரண்டாம் பாதி நன்றாகவே உள்ளது. மொத்தத்தில் பார்க்கலாம்.

படம் பார்க்காதவர்கள் இனி படிக்க விரும்பினால் படியுங்கள். 


படத்தின் முதல் காட்சியை இயக்குனர் இப்படி கோட்டை விடுவார் என்று சிறிதும் எதிர்பார்க்கவில்லை. பிரம்மாண்டமான அருவி அருமை. சிவகாமி ஆற்றில் அடித்து செல்லப்படுகிறாளா  அல்லது நடக்கிறாளா என்று  தெரியாத மாதிரி ஒரு இயக்கம். ஏன் இப்படி? இந்த காட்சி மனதில் ஒரு படபடப்பை உருவாக்க வேண்டாமா? 

காப்பாற்ற  வருபவர் குழந்தையை மட்டும் எடுத்துக்கொண்டு அந்த பெண்ணை காப்பாற்ற முயலாலதும் நன்றாகவே இல்லை.

இருபத்து ஐந்து வரை மலையேறி ஏறி கீழே விழுகிறார் நாயகன். ஆனால் மிகப்பெரும் சிவலிங்கத்தை அசால்ட்டாக தூக்குகிறார். 
பிறந்த குழந்தையாய் இருக்கும் பொழுதே சிவகாமியின் விரலை பலமாக பிடிப்பதால் தான் பாகுபலி என்று பெயர் பெறுகிறார். அவரால் ஏன் இதற்க்கு முன் மலை ஏற முடியவில்லை என்பதற்கு எந்த காரணமும் கூறப்படவில்லை. 
மலை ஏறுவதற்கு உந்து சக்தியாக ஒரு பெண்ணை தேடி நாயகன் செல்வதாக காட்சி படுத்தியுள்ளார்கள்.  இப்படி சிலபல காட்சிகள் சிறுபிள்ளைத்தனமாக சினிமாத்தனமாக உள்ளது.

அடிமை கட்டப்பா இருபத்து ஐந்து ஆண்டுகள் தேவசேனாவை காப்பாற்ற முயலாமல் திடீரென் ஒருநாள் விடுவிக்க நினைப்பது எல்லாம் கதையோடு பொருந்தாதவை.

நாயகன் உடைத்து கொண்டு குதிரையில் வருவதும், வில்லன் நாயகனை காணும் பொழுது தீப்பிழம்பு ஏற்படுவதும், மரம் பற்றி எரியும் காட்சியும் இவரின் மகதீரா படத்தை நினைவு படுத்துகிறது.

பல்லனின் சிலை நிறுவும் காட்சியில் உயிர் இல்லாமல் கலைஞர்கள் ஆடுவதும் பாடுவதும் பிறகு பாகுகுபலியின்  பெயரை கேட்டதும் ஆடல் பாடல் களை கட்டுவதும் அருமை. இதை இன்னும் கொஞ்சம் கூட அமர்க்களப்படுத்தி இருக்கலாம்.

அவந்திகாவை நூற்றுக்கணக்கான எதிரிகளிடமிருந்து பனிமலையை சறுக்கி காப்பாற்றுவதும் பிறகு பாறையை ஓடாமாக பிளந்து சறுக்குவதும் கண் கொள்ளா காட்சி. இவ்வாறு சிலபல காட்சிகள் அருமை.

பாகுபலி போரில் கையாளும் உக்திகள்  அருமை. 
நடிப்பை பொருத்தவரை அனைவரும் அருமை. 

நான் படித்த  வரை அருவி காட்சி, படத்திற்கு அமைக்கப்பட்ட செட், போர்க்காட்சிகளை பற்றி பலரும் புகழ்ந்துள்ளனர்.
இவையாவும் அருமை என்றாலும் இதுவரை நாம் காணாதது என்றெல்லாம் கூற முடியாது.  


படத்தின் பலம் காட்சியமைப்புகளும் சண்டைக்காட்சிகளும்.
முதல் பாதி என்னடா இது என்ற முணுக வைத்தாலும் இரண்டாம் பாதி சற்று விறு விறுப்பாக செல்வதால் படம் தப்பிக்கின்றது. 

நடைமுறையில் சாத்தியமான காட்சிகளுக்கு முக்கியத்துவம் கொடுத்து திரைக்கதையில் இன்னும் கொஞ்சம் கவனம் செலுத்தி இருந்தால் உலகத்தரம் என்று கொண்டாடி இருக்கலாம். 

Monday, October 27, 2014

அம்மா பால் வருமா?

அம்மா உணவகம், குடிநீர், உப்பு, மருந்தகம்,சிமெண்ட் வரிசையில் அம்மா பால் வருமா என்பது என்னுடைய சந்தேகம்.வரவேண்டும் என்பதே பலரது விருப்பமாகவும் இருக்கும் என நம்புகிறேன்.

பால் கொள்முதல் விலையேற்றத்தினால் பால் உற்பத்தியாளர்கள் பயனடைவார்கள். அதேநேரத்தில் நுகர்வோர்கள் பாதிக்கப்படுவார்கள். சில நேரங்களில் விலை ஏற்றம் என்பது தவிர்க்க இயலாதது. மேலும் இது காலத்தின் கட்டாயமாகவும் இருக்கின்றது.

கொள்முதல் விலையை ஐந்து ரூபாய்க்கு ஏற்றினால் அதே ஐந்து ரூபாய்க்கு பால் விலையையும் ஏற்றி இருக்க வேண்டும். பத்து ரூபாய் ஏற்றியது ஏன் என்று சிந்தித்தால்...ஊழியர்களின் சம்பளம், எரிபொருள்  மற்ற பிற செலவுகளை கணக்கில் கொண்டு உயர்த்தி இருப்பார்கள் என நினைக்கின்றேன்.

பால் என்பது குழந்தைகளுக்கும் முதியவர்களுக்கும் மிக மிக அத்தியாவசியமான உணவுப்பொருள். இதனால் சிரமப்பப்பட போவது நிச்சயமாக ஏழைகளே. ஏழைகளின் நலனை கருத்தில் கொண்டு அவர்களுக்கு மட்டும் குறைந்த விலையில் பால் கிடைக்க அரசாங்கம் ஆவன செய்யவேண்டும். அம்மா பால் நிச்சயம் ஏழைகளின் வயிற்றில் பால் வார்க்கும். செய்யுமா அரசு? வருமா அம்மா பால்? அல்லது குறைந்த விலை ஆவின்பால்?
Related Posts Plugin for WordPress, Blogger...